Hardanger Big Band og Arild B. Nielsen ønskjer å presentere bandet saman med songar og komponist Nina Jori Pedersen !
Hardanger Big Band ( HBB) med musikalsk leiar, dirigent og vinnar av Norsk Jazzforums Storbandpris 2021-Arild B. Nielsen-siktar mot Lillestrømfestivalen 2022. Med seg har bandet dei Roma-baserte musikarane - og Noregs nye store jazzsongar - Nina Jori Pedersen og stjernepianisten Pierpaolo Principato. I notebunken har HBB Nina sine låtar, spesialarrangert for Hardanger Big Band av Jens Wendelboe og Marco Tiso.
Hardanger Big Band (HBB) vart starta av musikalsk leiar Arild B. Nielsen i Jondal, Hardanger, som Jondal Storband i 1987. Herborg Kråkevik er blant dei som fekk sin musikalske start i bandet. I år feirer HBB 35-årsjubileum som eit band med musikarar frå heile Hardanger, Bergen og med dyktige innflyttarar frå Romania og Australia, i tillegg til europeisk samarbeide med Italia-baserte musikarar. Gjennom denne tida har bandet, saman med Arild, opplevd mange fine musikkøyeblikk, laga mange spesielle prosjekt og samarbeidd med flotte og dyktige musikarar som Gisle Torvik. Som ein vel fortent heider fekk Arild tildelt Storbandprisen 2021! Det musikalske samarbeidet med Nina Jori Pedersen starta allereie i 2017.
Nina er jenta frå Grimstad som tok ein solid musikalsk utdanning i Noreg og seinare vidareutdanning under mellom anna Karin Krog, drog til Roma og har bokstaveleg jobba seg opp frå en svolten kvardag til å ha undervist på Saint Louis College of Music, den einaste private musikkskulen i Italia med rett til å uteksaminere studentar på mastergradsnivå. I tillegg skriv ho sin eigen musikk og har gjeve ut fleire CD,ar. (Søk på youtube og nrk.no). Ho driv også eigne kor og band med Pierpaolo Principato som pianist.
Pierpaolo Principato er jazzpianist på høgt europeisk nivå. Å liste opp musikalske merittar i Europa og Japan frå 1988 er det ikkje plass til her. Men det spenner frå jazzband, til konsertturnèar med leiande musikarar som no avlidne Nini Rossi, musikalar, teaterstykke, deltaking i radioprogram og innspelingar av ei rekke CD,ar, mellom anna med den amerikanske rockartisten Richie Havens. Han femner musikalsk vidt! Pierpaolo underviser på Saint Louis College of Music i Roma.
Musikken som HBB har framført saman med desse to, har gitt bandet mange store opplevingar, blant anna på Vossajazz i 2019, fleire konsertar på jazzklubbar i Roma og andre byar, men og i Bergen og Hardanger. Når dette har vorte så godt motteke, heng det saman med HBBs dyktige maestro Arild B. Nielsen og musikarane i bandet . I dei spesialarrangerte arrangementa ligg det mange flotte soloar som blir spelt frå øverste hylle av dyktige solistar, både frå blåsarar og kompet i bandet, og ikkje minst Arild B. Nielsen sjølv!
HBB deltok på Storbandfestivalen allerede i 2014, saman med Gisle Torvik., samt at bandet fekk tildelt plass i 2019, som då gjekk ut grunna Covid-19.
